Posted by admin

Sy hinget dreamend út it finster
nei’t se sjoen hat it ferhaal
dat Rembrandt oanbrocht op it doek,
it wie it libben bleat op goadeskaal:
geweld en leafde as gebrûk,
oerstriele mei Zeus’ glinster.

Danaë, kening Argos’ dochter,
krige libbenslang, want swier
mocht sy net wurde fan in soan
dy’t deadzje soe syn pake yn it jier
dat hy geskikt waard foar de troan,
dat machtleas wie de rjochter.

Doe kaam god Zeus mei oare strielen
as syn glinster, swaaiend as
de blossem fan de gouden rein,
syn rûge krêften brieken daliks los,
de faam is doe mei swierte slein
en mocht nij libben fiele.

En Saskia dreamt oer it dielen
fan dit libben sûnder ein.

* Rembrandt (1606-1669)
Tekening ‘Saskia yn it finster’
Skilderij ‘Danaë’

Syn ynspiraasje wie it dier:
fan bolle, skiep oant weiten hin,
fan hoanne, geit oant bûnte ko,
gjin bûtenbist wie him te min,
syn eachweid rikte fier.

En mocht de boer derachter stean,
dan kaam dy ek op it portret
mei ’t dûbelstel en ’t iennichst bern,
want Paulus Potter syn ferlet
wie sjen nei bisteklean.

* Jacobus Ludovicus Cornet (1815-1882)
Skilderij ‘Portret fan Paulus Potter,
tekenjend yn de natoer’

** Paulus Potter (1625-1654)
Skilderij ‘De bolle’