Posted by admin

Kâld as roet wie ’t yn de moarn
doe’t yn it doarp de waarmte kaam
fan him dy’t wat te sizzen hie;
hjoed wied er hiel gewoan
foar ’t sljochte folk en de jongfaam
dy’t wat op ôfstân stie.

Boargemaster fan de stêd,
mar ek wol fan it lytste plak,
sa stie de pommerant bekend,
hy kaam it folk oer ’t mêd,
siet samar lyk mei ’t wite dak,
dat wiene sy dêr wend.

Harkjend bûgde hy foaroer
en wie begien mei ’t kâld ferhaal
dat alleman te sizzen hie:
it libben wie in toer;
doe klonk foar elk yn kleare taal:
hy hold it yn berie.

Mar de faam, alhiel yn ’t read,
fernaam gjin waarmte, dat sy hie
foar elk te sizzen mear as neat:
’t moast komme ta de die.

* Józef Chelmónski (1849-1914)
wie in Poalske skilder
dy’t yn in realistyske styl
patriottisme útbylde.
Skilderij ‘Moeting mei de boargemaster’

Komt it libben út de Hear syn hân,
dan makket Hy in grut ferskil,
de iene kreas, fan hege stân,
de oare kleurich, wyld fan wil.

Sofonisba wiist op wiishheid, net
allinnich ûnder oaren, mar
ek boppeminsklik, nei de wet
fan tsien, ornearre krekt foar har.

Wyt de brede kraach fan suverheid,
it swarte kleed stiet foar de earnst,
mei beide is se himelsk klaaid,
de Hear syn krús draacht se út wenst.

Diabolus lit syn tosken sjen
en libbet nei de wet fan tel
oant seis, dan bist foargoed ferlern,
ik sljochtsje ’t paad wol nei de hel.

* Sofonisba Anguissola (1532-1625)
wie skilderes oan it keninklike hôf
yn Spanje.
Skilderij ‘Selsportret’

** Karel Appel (1921-…)
hearde ta de Cobrabeweging,
dy’t oprjochte waard yn 1948.
Skilderij ‘Fantoom mei masker’