Posted by admin

’t Kin elkenien oerkomme
as de holle op ‘e doele is,
gjin stjoer mear oan de hannen jout;
it giet mei frou en berntsjes mis
wannear’t har man der rûch op hout…
wat koe it Herkules ferdomme!

Foar straf moast hy doe stride
tsjin de tolve, suver net te dwaan,
dêr’t ien fan wie it sterke swyn,
dat mei syn slachtosk elk ferslaan
koe, siedde ’t fjild mei eangstbloed yn
en rispe ’t fleis fan alle siden.

Mar Herkules hie spieren
hurd as stien, gjin slachtosk krong deryn;
oer beide hannen kriich er stjoer,
sadat er rap syn fijân fong…
en oan syn fuotten siet it swyn
as wie ’t it tamst fan alle dieren.

* Laurent Delvaux (1696-1778)
is ek bekend wurden fan de preekstuollen
dy’t er makke.

Men sei ’t koe sprekken lije,
mei dy fjouwer like ’t ideaal:
acht fuotten op ‘e flier
en hân yn hân yn ’t iepenbier,
dat al mei al in goed ferhaal.

Doe kaam de tiid fan lijen,
mei de krisis spatte ’t út elkoar:
twa fuotten derby wei,
’t waard foar elkien in ommeswaai,
se rekken út it rjochte spoar.

Se stiene wer yn ’t neaken,
diskear mei in oar, in rotgefoel:
de hannen yn it hier,
de skuor kaam yn it iepenbier,
de smoargens streamde yn ’t rioel.

* Ray Charles
Keunstwurk mei ferskillende materialen
‘Famylje Românse’ (1993)

** Georg Baselitz
Keunstwurk mei ferskillende techniken
‘De grutte nacht yn de goate’ (1963)