Posted by admin

Wat west hat, komt werom op ierde…
sjocht de sinne noch wat nijs?
De flakte is in grimel-
grammel: folk dat ûnderweis
is… wa sil harren fierder liede?

Sigeuners wenje yn in hoale
op ‘e berch, har iennichst thús,
foar ’t ierdske folk yn ’t skimer;
healwei stiet in ljochtsjend krús,
sy ha as Him fersliten soalen.

Wat west hat, is werom op ierde,
boppe ’t berchfolk driuwt de wolk,
mar kin dy fierder liede?
Mozes is net mear Gods tolk,
it wurd slacht troch nei misse dieden.

* Joos de Momper (1564-1635)
Skilderij ‘Lânskip mei sigeuners’

Sjoch him net as katolyk,
yn ’t algemiene sjocht er neat,
hy stiet foar God en syn gelyk
en al it oare is ferkeard.

Mei syn skjinne, rûne kraach
heint hy de wiere wurden op,
allergysk foar krityk of fraach,
hy stiet foar God en syn gebod.

Mei syn hannen hâldt er fêst
oan ’t bibel- en it eigen wurd,
hy sit der mei syn preek nea nêst,
ferbynt de geast mei earnst en nut.

Sjoch har antlit mei in glim
no’t sy it Wurd sels lêze kin,
fan Babel oant Jeruzalem,
sa krijt it algemiene sin.

* Jan Anthonisz. Van Ravesteyn (1570-1657)
Skilderij ‘Portret fan in dûmny’

** Pieter Verelst (sirka 1618-nei 1668)
Skilderij ‘Portret fan in âlde frou mei Bibel’