Posted by admin

Dalet, doar mei fjouwer hoeken
alle kanten fan de skepping út,
as tagong nei de geast
dy’t strieljend fan Jahweh ûntslút
sjaloom de ierde yn it rûn.

Iepen doar foar de seizoenen,
rinnend op it ritme fan it jier,
foar elk in eigen geast,
dy’t oarder jout oan plant en dier
en minsken meinimt yn it rûn.

Iepen doar foar eleminten,
ierde, wetter en ek lucht en fjoer,
ferskaat mar yn de geast
fan groei fan plant en dier, as boer
skrept noch de minske op dy grûn.

Iepen doar foar fjouwer memmem
dy’t as earsten joegen bern it ljocht,
fertrouwend dat de geast
Jahwehs sjaloom al strieljend brocht
op oan de heit ûnthjitten grûn.

Sjoch ek: Religy Alef, Beet, Gimel

Kamiel, do drager fan de swierste lêsten,
rykdom bringst troch it bestean,
in karavaan fan trije bêsten
hat in lange wei te gean.

Kamiel, de rykdom wurdt al folle lichter
as it each fan God dy stjoert,
dan komsto stadichoan al tichter
by de earme sûnder moed.

Syn biddelsek is leech en hieltyd swierder
wurdt dy, want wêr is de oar
dy’t draacht syn earme lêsten fierder
oer de drompel fan de doar?

Kamiel, do drager fan de swierste lêsten,
draaf de earme achternei,
it each fan God sil op dy rêste,
read wurdt al de nije dei.

Sjoch ek: Religy Alef, Beet