december 21, 2023
fan Georges Rouault*
It binne trije rjochters
dy’t de ienheid fan de steat
ferbyldzje dêr’t tal minsken yn
ferkeare, sawol dei as nacht,
fierwei de measten folgje
wetten fan de sletten steat
en dogge neat ferkeard.
Der binne trije oaren
dy’t de ienheid fan de geast
ferbyldzje, iepen nei elkoar,
ferkearend sawol dei as nacht
yn steat fan bang fermoeden
dat sy foar de rjochters stean
dy’t foar it steatsrjocht gean.
De trije rjochters rjochtsje
har op god, dy jout de steat
it rjocht fan eigen wet sprekt rjocht
wat krom is mei de seine fan
de pryster fan it Kremlin…
wêr’t de trije oaren ek
foar stean, sy binne gek.
* Georges Rouault (1871-1958)
Skilderij ‘De trije rjochters’
december 20, 2023
fan ûnbekend*
Ezechiël
Do minskesoan, hâld rjochtdei
oer Jeruzalem, de stêd dy’t bloed
troch alle strjitten streame lit,
dy dei sil sprekke oer de dagen
dy’t de stêd net mear belibje sil,
lit witte hoe’t it sit.
De âlders wurde net yn
eare holden, wees en widdo ha
in min bestean, de sabbat kin
gjin sprekken lije, op ’e bergen
wurde offers oan de goaden brocht,
lit witte it ferrin.
Oan regels wurdt net holden
as it om de drift fan ’t lichem giet,
de seks nêst dy fan man en frou,
jim liene jild tsjin woekerrinte
út, fermoarde wurdt der ek foar jild,
jim nimme ’t net sa nau.
De smoarge winst dy’t makke
wurdt, fertsjinnet klappen mei de fûst,
ûntnommen wurdt jim alle moed,
de folken sille jim bespotte
as de ballingskip úteinset is
as straf foar al it bloed.
* Yllustraasje ‘Rjochtspraak’