december 25, 2023
It daget fan ’e moarn yn ’t easten
foar myn eagen, mar net foar it hert
dat bûnzet op it fjurrich stampen,
want Habsora driuwt it rinnen oan,
it evangeelje sa’t it godsfolk wol.
Keunstmjittich is yntelliginsje
dy’t raketten oanstjoert, want de wet
fan Israel ken gjin genede:
trijentweintichtûzen doelen hat
it wrede evangeelje al berikt.
De krêbe skoddet fan de knallen,
wat it godsbern oan it gûlen set,
de ezel balt: ‘Wêr is no frede?’
’t Antwurd fan de okse komt der net,
it evangeelje fan it godsfolk wol.
It daget fan ’e moarn yn ’t easten,
mar it stampen giet mei hertsear troch,
wylst ik in krús sjoch yn de tûken,
dat Habsora wit hoe faak fertelt,
in dûbel evangeelje, dat net klikt.
* Habsora is it kompjûterprogramma
dat de Israelyske raketten oanstjoert;
it Hebriuwske wurd betsjut evangeelje
december 24, 2023
fan ûnbekend*
Lit ús harkje nei de komposysje
fan John Cage mei stilte en muzyk,
lit de piano earst mar swije
twahûnderttrijensantich tellen lang
om oan de berteskreau te wijen.
Yn de stilte klinkt de skreau noch lûder
as it blêtsjen fan de keppel skiep
op Betlehems ferlitten fjilden,
de nachtlik neare oeren duorje lang,
om’t dy fan ingels net optilden.
Alle ingels ha ferlein de rûte
nei it fjild fan Gaza, dêr’t de bern
fan klearebare wanhoop skreauwe,
want bommen falle op har fjild al lang…
it is fan ’t godsfolk net te leauwen.
Lit ús diskear net fan frede sjonge,
elke toan wurdt troch in knal oerstimd,
de ingels boppe Gaza swije
twahûnderttrijensantich tellen lang…
it godsfolk lit sels bern lang lije.
Sels it godsbern leit stil yn de krêbe,
harket nei de stilte yn it fjild
dêr’t net ien skiep fan bangens lûd jout:
sântûzen berntsjes in memoriam…
sjedêr ien bern dat noch wat moed jout.
* Yllustraasje ‘Ingels boppe Gaza’