december 31, 2023
fan Vincent van Gogh*
Flitsend fjoerwurk yn de nacht
om âld nei nij te fieren,
al it âlde giet foarby,
geweld kin der nei fluitsje
as skel fluitsjend yn syn plak
de pylken sjitte yn de hichte,
âld wurdt flitsend nij.
Lit raketten yn de nacht
de himel net ferljochtsje
om in wûne yn it hert
te slaan fan folk dat fleurich
oer de drompel soe fan âld
nei nij, mar rekket yn de lichte,
âld is sa’n raket.
Slaan fannacht breadronken acht
op stjerren oan de himel,
al miljarden jierren âld,
draai fleurich fluitsjend mei de
romte troch fan âld nei nij,
men is oan dizze tiid ferplichte:
ljochtsje by de wrâld.
* Vincent van Gogh (1853-1890)
Skilderij ‘Stjerrenacht’
december 30, 2023
fan Lourens Alma-Tadema*
Wol harkje nei syn namme
as wie hysels de sinnegod:
Heliogabalus,
hy struide roazen yn it bad
en liet syn folk dêryn ferdrinke…
hat er him dêr ea foar skamme?
Wol harkje nei de namme
as wie hysels de Kremlin-god:
Poetin, koart en krêftich
struit hy syn leagens yn it rûn
dêr’t folgelingen graach yn swimme…
dêrfoar hat er him nea skamme.
Ferflok him lûd, ferjamme,
as roazen wurde ta raket,
reitsjend Oekraïne…
wa heart de stim fan ’t hecht ferbûn?
Lit yn syn leagens him fersûpe,
strui ien roas yn fredesnamme.
* Lourens Alma-Tadema (1836-1912)
Skilderij ‘De roazen fan Heliogabalus’