februari 2, 2025
fan ûnbekend*
fan ûnbekend**
George Marshall, berne mei ien stjer
om’t er út ’e middenklasse kaam,
klom op nei’t militêre firmamint
en letter nei it politike,
syn karriêre wie lykas in sprint.
As generaal fan hjir nei dêr;
yn de Earste en de Twadde Kriich
koördinearre hy de strategy,
útrinnend op ’e alliearre
sege mei fiif stjerren foar syn rie.
Fiif stjerren wiene net genôch
om yn Sina te bemiddeljen:
de Kommunist fersloech de Kwomintang,
tegearre woe it net regearje…
dus Taiwan as steat, mar foar hoe lang?
George Marshall seach oan ’t firmamint
bleke stjerren nei de Twadde Kriich:
Europa’s steaten yn in minne steat,
hy koe sa’n útsicht net ferneare,
mei syn stjerren waard de delgong keard.
* Foto ‘George Marshall’
** Print ‘Marshall-help’
januari 30, 2025
fan Karel du Jardin*
Wêrom soe hy stean of sitte
no’t de skiep har deljûn ha
en ’t hynder yn de buert bliuwt;
as hoeder hat er neat te dwaan,
hy leit it leafst mei dizze hjitte.
Fan ’e moarn hat heit him hjitten
op te passen op ’e skiep,
de hûn en ’t hynder giene
mei om op ’t soantsje acht te slaan:
‘Ik hoech net oer dy yn te sitten.’
Hy stie earst, doe gie er sitten,
deljûn hat er him op ’t lêst
om oan te gean mei harren
hûn, dêrnei him ’t gerak te jaan:
in slokje wetter yn de hjitte.
* Karel du Jardin (1626-1678)
Skilderij ‘Italiaansk lânskip mei in jonge hoeder,
boartsjend mei de hûn’