augustus 14, 2017
It is gjin fûgel sûnder kop,
de miuw as hearsker fan de mar
by Heech, hy nimt in peal foar kar
en knapt him efkes op.
Men kin net mei in skeane fear
dêr sitte foar in grut publyk,
dat by Wâldsein stiet op ’e dyk
en sjocht… wa is der mear?
O ja, de skûtsjes fan de float,
no tolve, fjirtjin sûnder twa,
dy’t op ’t bestjoer de smoar yn ha,
se slute gjin akkoart.
O nee, se ha gjin stive kop,
ek sûnder dogge se it net,
’t giet inkeld om dy stive wet
en om it hege krop.
Sjedêr, se brûze derop ta,
de stielen koppen fan de float
mei koppen, hurd as stiel, oan board,
dus in protest, no sa!
It is in fûgel mei in kop,
de miuw sjocht skerp de griene oan,
as hearsker sit er op ’e troan:
‘De Pan knapt it ek op!’
augustus 13, 2017
fan ûnbekend*
fan ûnbekend**
De bruorren Wright, as fytsemakkers
hiene sy in goed bestean,
dochs woene sy leafst hegerop
lykas in hauk en oars in earn.
By Kitty Hawk koe dat wol wêze,
want dêr wie genôch termyk
foar ’t sweven sûnder tuskenstop,
se fielden har in hauk allyk.
Mei motor waard it tastel swierder,
mar technyk joech kop en hân
de krekte rjochting nei de top,
doe stie de ‘Flyer’ op it lân.
It tastel fytste ears mei faasje,
rekke doe los fan de grûn,
mar kaam net folle hegerop,
de hauk hie ’t fan de ‘Flyer’ wûn.
* Foto ‘Bruorren Wriht op ’e fleanmasine’
** Foto ‘De Flyer’