juni 7, 2018
fan Vassily Kadinsky*
fan Gabriele Münter**
Sa skildere Kadinsky:
eksploasjes fan nij libben,
want yn bange tiden is der hoop,
dus lit de kleuren sprekke
lykas it universum
troch de teleskoop.
Sjedêr de man Kandinsky,
yn ’t swart hat hy posearre
foar Gabriele Münter, sy hie hoop
om him ek te berikken
yn ’t eigen universum
as har filantroop.
Syn hert is fierder swalke,
eksploasjes fan nij libben
joegen him wer hoop om troch te gean
en folken oan te sprekken:
gjin striid en revolúsje,
mar in rom bestean.
* Vassily Kadinsky (1866-1944)
Skilderij ‘Komposysje VII’
** Gabriele Münter (1877-1962)
Skilderij ‘Kadinsky’
juni 6, 2018
fan Peter Gertner*
Net dat ik faak dêrhinne gean,
mar hjoed woe ik der wol op ta,
want trije kamen tagelyk oan ’t krús,
dy Jezus ek, de man út Nazaret,
yn dy kontreien hearde hy eins thús,
afijn, syn boadskip wie bysûnder,
dêrom wie ik ek op Golgota.
It wie grif syn fertsjinne lean,
sa wie op Golgota it praat
en earlik sein, ik tocht der ek sa oer,
teminsten earst, mar nei it húnjen net…
de skriftgelearden makken my doe poer,
se fergen Jezus op in wûnder,
dêryn klonk ferachting troch, sels haat.
Ik koe net langer dêr sa stean
mei lege hannen… wat koe ’k dwaan?
Neat dochs…, mar wie dat wol in goed ekskús?
Ik wist, it wie foar aksje doe te let,
want Jezus hong te stjerren oan ít krús
as wie hy hjir de grutste sûnder…
wat koe ik him oars as achting jaan?
* Peter Gertner (1495/1500-1541)
Skilderij ‘Krusiging’