juni 29, 2018
fan Jacques-Louis David*
Andromache, frou fan Hektor,
Trojes aldergrutste held,
in frou dy’t folle net genôch ferlear,
sy hat de deaden op har fingers teld
en wie mei njoggen noch net klear.
Heit, har man en noch sân bruorren
waarden troch Achilles slein,
it bloed rûn yn Skamandros, in rivier;
de frou fan Hektor wie har rie te’nein,
de ein kaam noch, it wie safier…
… dat se sjen moast dat har soantsje
fan de muorre smiten waard,
wylst Troje gûlde om dy bernemoard;
de Griken hiene oars net as spotsk praat
doe’t Andromache kaam oan board…
… fan Achilles’ soan, dy’t Pyrrhos
hiet, foar har in anty-held,
dy’t op har ynstiek mei syn spot en spear;
foar Pyrrhos hat him ek in moardner meld…
foar Andromache kaam de kear.
* Jacques-Louis David (1748-1825)
Skilderij ‘Andromache treurt om Hektor’
juni 28, 2018
fan Emile Claus*
De himel kleuret as by jûn,
mar ’t is noch winterdei,
de tint fan ’t fûgeltsje fan ’t iis
hat oan it lânskip skientme jûn,
mar kleuren kinne net ferfange
it flitsen en de fangst dêrnei.
Gjin tûke hinget oer it iis,
te dik en ek te hurd
om mei de snaffel troch te slaan,
it is foar ’t fûgeltsje in griis,
it hat nei waarmer oarden lange
en leit no stiif fan kop oant sturt.
Op tinten komt bewegend swart
mei sliden foar de gong,
de jonge fûgels fan it iis;
se ha har op ’e snie al ward
en sille mei bloedreade wangen
de poel op, wylst it iisbist sjongt.
* Emile Claus (1847-1924)
Skilderij ‘De iisfûgels’