juni 30, 2018
fan Peter Paul Rubens*
My sit de skrik noch yn de skonken
nei de ûnderfining by it grêf
fan wa’t se oan it krús slein ha,
’t is wrachtich wier,
gjinien fan ús wie dronken.
As wachter moatst wol wekker bliuwe,
want it risiko wie libbensgrut
dat kunde ’t lyk weinimme soe,
dus wy yn ’t spier…
net sliepe, ek net priuwe.
Sa’t ik al sei, wat bin ik skrokken
fan it ljocht en ’t skodzjen fan de grûn,
ien fan myn maten lei foar dea,
’t is wrachtich wier,
ien flokte ûnder ’t skokken.
Mar net mear by de hege hearen:
elk soe lige foar in grou stik jild
dat kunde ’t lyk weinommen hie,
’t gie my te fier,
mar koe ’k de leagen keare?
* Peter Paul Rubens (1577-1640)
Skilderij ‘De ferrizenis fan Kristus’
juni 29, 2018
fan Jacques-Louis David*
Andromache, frou fan Hektor,
Trojes aldergrutste held,
in frou dy’t folle net genôch ferlear,
sy hat de deaden op har fingers teld
en wie mei njoggen noch net klear.
Heit, har man en noch sân bruorren
waarden troch Achilles slein,
it bloed rûn yn Skamandros, in rivier;
de frou fan Hektor wie har rie te’nein,
de ein kaam noch, it wie safier…
… dat se sjen moast dat har soantsje
fan de muorre smiten waard,
wylst Troje gûlde om dy bernemoard;
de Griken hiene oars net as spotsk praat
doe’t Andromache kaam oan board…
… fan Achilles’ soan, dy’t Pyrrhos
hiet, foar har in anty-held,
dy’t op har ynstiek mei syn spot en spear;
foar Pyrrhos hat him ek in moardner meld…
foar Andromache kaam de kear.
* Jacques-Louis David (1748-1825)
Skilderij ‘Andromache treurt om Hektor’