juli 22, 2018
fan ûnbekend*
It wie in tiid fan revolúsje,
opstân tsjin de eallju en de tsaar
en dêrnei de reaksje
mei geweld, dêrby rûn elk gefaar.
Troch deportaasje, ekskekúsje
kamen withoefolle boargers om,
gjin sprake mear fan aksje,
Russyske ferhâldings bleauwen krom.
Dochs kaam der stadichoan feroaring,
yn Europa stie de tiid net stil,
wat frege om reaksje
tsjin tsaar Nikolaas syn macht en wil.
De Doema** wie foar him fertoaning
fan de folksgeast, inkeld foar in part:
it folk as lytse fraksje,
grut de macht fan wa’t it measte hat.
De Doema wie mear as yllúzje,
dus smiet Nikolaas de doarren ticht,
wat frege om reaksje:
wer in revolúsje kaam yn sicht.
* Foto ‘ Iepeningstaspraak fan tsaar Nikolaas II
yn 1906 foar de earste Doema’
** It Russyske parlemint
juli 21, 2018
fan Pieter Pietersz. de Aldere*
Wêr moasten wy oars hinne
as nei Galiléa, dêr’t de mar
oan ús as fiskers loek;
it wie benammen Petrus’ kar,
hy foel werom op ús berop…
hoe soe hy him fersinne?
Dy nachts ha wy neat fongen,
dat it sin fan Petrus wie mar min,
want wiene wy sa tûk
wol bleaun as fiskers yn de rin
fan trije jier? It wie in strop
foar him en foar de ponge.
Wy hearden doe ien roppen
oft der yn de nacht wat fongen wie,
ús antwurd is bekend;
it kaam frjemd op ús oer: syn rie
wie ’t net moast oan de rjochterkant
as kaam de fisk fan boppen.
Ik ha ’t ynienen witten
dat mar ien de wrâld feroarje koe,
wy wiene it wol wend
fan Jezus, wat hy no ek soe,
dat Petrus sprong yn ’t wetter, want
hy seach it doe wer sitten.
* Pieter Pietersz. de Aldere (1540/1541-1603)
Skilderij ‘Jezus by de mar fan Tibearias’