augustus 2, 2018
fan Pedro Alvarez*
In God we trust,
sjedêr de wurden op ’t kongresgebou,
dêr’t flaggen ‘wolkom’ roppe,
Kuba pronket as in pau,
it is in lust.
In God we trust,
de yndiaan bliuwt oan de ierde trou,
de Spanjaard telt de koppen,
katolyk fertsjinnet grou,
it is in must.
In God we trust,
de Yankee nimt de wurden net sa nau,
mar syn revolvers roppe,
ûnferskillich man of frou,
de tûkste first.
Hy doesn’t trust
wa’t komme, is ’t kongres net sekulier?
Kubanen binne boppe,
alle dagen yn it spier,
fan ’t wurk bewust.
* Pedro Alvarez (1967-2004)
Skilderij ‘It earste Kubaanske kongres
oer it doel fan de skiednis’
augustus 1, 2018
fan Fritz von Uhde*
Gjin twivel oan, ik moat it leauwe,
want ik ha myn les wol leard
en boppedat ha wy klear sjoen
hoe’t Jezus fan de ierde gie
nei boppen ta, it wie net neat,
ik seach dat wolken foar him dreauwen.
It wie net neat wat wy earst hearden;
foar’t er fan de ierde gie,
hat Jezus ús de opdracht jûn
fan him te tsjûgjen mei de Geast
dy’t oer ús komme soe om rie
te jaan, sa koene wy it rêde.
Hoe koe ik twivelje oan ’t libben
nei de dea? Ik moast it sjen
foar ’t my syn opstean dúdlik wie;
ik seach twa ingels, hjoed foar ’t earst:
‘Jim sille him wer sjen!’As bern
sa bliid ha wy it lok belibbe.
* Fritz von Uhde (1848-1911)
Skilderij ‘Himelfeart’