oktober 11, 2024
fan Albert Bierstadt*
De Rockies makken djippe yndruk,
dy ympresje kaam sa op papier
dat skôgers witte lieten:
‘Dizze skilder lit ús sjen
in nije styl, net foar de sier,
mar lykas de natoer de yndruk jout.’
Mar doe’t de skilder fan de stúdzje
ôf it byld brocht op it grutte doek,
feroaren skôgers harren
miening: ‘Sjoch wat giet ferlern
as ’t skilderjen wurdt âld gebrûk
en de natoer gjin ynspiraasje jout.’
Wat bliuwt, dat binne wol de Rockies,
ymposante bergen, rikkend fier
út boppe sljochtweihinne
minsken, wa kin dan besjen
de hichte útgeand boppe sier
dy’t inkeld tydlik ynspiraasje jout?
* Albert Bierstadt (1830-1902)
Skets op papier ‘Canadian Rockies’
oktober 10, 2024
fan Ralph Bruce*
De hannen bûn, fêst oan in peal,
de skonken stiif troch kjeld en stress,
de holle fol mei tinzen, flits nei flits,
de hertslach yn in rappe roffel,
hy stiet nêst syn maten.
De wrâld hie kleur, mar is no feal,
it read sloech op de tsaar syn bloed
dat floeie soe, fiif skotten, flits nei flits,
gjin hertslach mear foar fûle klappen,
tiid om frij te praten.
Syn libben wurdt net iens mear heal,
lit stean dat hy noch pake wurdt,
dan heart er stille skotten, flits nei flits
krijt hy foar eagen, mar gewearen
swije, hy heart praten.
Hy stiet noch, mar dan wol foar peal,
folslein ferstive fan de stress
dy’t dûbel oankomt, dea en no net mear,
de graasje lit de roffel duorje…
lang sil Fjodor libje!
* Ralph Bruce
Skilderij ‘Graasje foar Fjodor Dostojevsky’