december 3, 2018
Men moat it dochs wol witte
dat er thúsheart yn de einekoai,
wat goed te sjen is oan syn rinnen
sûnder lûd, it giet him om de proai.
Stil koed er net mear sitte,
dat hy draafde nei de Grienedyk
om deipassanten ta te blaffen:
‘Kom meikoarten nei it eineryk!’
Gjinien mei it ferjitte:
trije iuwen leit de koai yn ’t fjild,
salang ek moasten poaten rinne
sûnder lûd, se binne heger tild…
… as dy fan oare hûnen,
jakkerjend oer ’t lege Pottenstrân,
sadat de einen, mei troch ’t blaffen,
kwêkjend fleane oer it lân…
… om yn de koai te swimmen,
dêr’t gjin stap fan hûnepoaten klinkt,
mar dêr’t it hûntsje fan de foto
sûnder lûd de koaiker winkt.
december 2, 2018
fan ûnbekend*
Der wurdt wol sein: ‘It is net wier
dat Peary op ’e Poal west hat.’
Dochs wie ûntdekken wol syn fak,
it kâlde noarden wie him net te fier.
Wat wier is, wie syn iere plan
om nei it hege noarden ta;
mei ’t Griene Lân as tuskenplak,
gie hy fûl fierder as koelbloedich man.
Hy foer earst mei de ‘Roosevelt’
safier as ’t iis him hawwe woe,
hy fielde him dêr presidint,
de eskimo’s beskôgen him as held.
Mei fjouwer glied er oer it iis,
mar Cook wie ek al ûnderweis
as syn fûleindich konkurrint…
de Noardpoal seach it oan en joech gjin priis.
Der wurdt wol sein: ‘It is net wier
dat Cook en Peary dêr west ha.’
Gjin tsjûge wie doe op dat plak…
de Noardpoal wie foar har miskien te fier.
* Foto ‘Robert Edwin Peary’